Рускиот премиер Владимир Путин денеска во Централната изборна комисија ја предаде документацијата за официјална регистрација како кандидат за претседателските избори, што треба да се одржат на 4 март следната година.
Путин, како кандидат на партијата Единствена Русија, лично ја донесе документацијата во ЦИК.
Според руските закони, изборната комисија има десет дена да се изјасни за кандидатурата.
Путин е прв руски политичар што поднесе барање официјално да биде регистриран како кандидат на мартовските избори.
Тој беше претседател на Русија во два мандата, од 2000 до 2008 година, а намерата повторно да се кандидира ја обелодени во септември.
Руските медиуми пренесуваат дека се очекува на изборите да учествуваат најмалку четири кандидати, а речиси е извесно дека меѓу нив ќе биде лидерот на Либерално-демократската партија на Русија Владимир Жириновски, лидерот на руските комунисти Генадиј Зјуганов и водачот на партијата на левиот центар Праведна Русија, Сергеј Миронов.
